ENAT

គេប្រើ ENAT សម្រាប់បង្ការ និងព្យាបាលកង្វះវីតាមីន E ។ វីតាមីន E មានវត្តមានស្រាប់នៅក្នុងអាហារមួយចំនួន ហើយត្រូវបានគេប្រើបន្ថែមក្នុងទម្រង់ជាអាហារបំប៉នក្នុងពេលចាំបាច់។ វីតាមីននេះ គឺជាសារធាតុប្រឆាំងអុកស៊ីតកម្មដ៏ខ្លាំង ដែលការពារកោសិការបស់រាងកាយពីការខូចខាតដែលបណ្តាលមកពីមុខងាររាងកាយ។ វីតាមីននេះ ក៏ជួយថែរក្សាស្បែកឲ្យមានសុខភាពល្អផងដែរ។

ENAT ផ្សំឡើងដោយវីតាមីន E ក្នុងទម្រង់ជា d-alpha tocopheryl acetate។ វីតាមីននេះ ​ជា​ទម្រង់​ធម្មជាតិ​នៃ​វីតាមីន E ដែល​ងាយ​ជ្រាប​ចូលក្នុង​រាងកាយ។

គេណែនាំឲ្យតែមនុស្សពេញវ័យគ្រប់អាយុ ១៨ ឆ្នាំ ឬចាស់ជាងនេះពិសា ENAT តែប៉ុណ្ណោះ។

លោកអ្នកអាចពិសា ENAT ជាមួយនឹងរបបអាហារផ្សេងទៀតបាន ព្រោះវីតាមីននេះជួយបង្ការការខូចខាតដោយប្រតិកម្មអុកស៊ីតកម្ម។ អុកស៊ីតកម្មកើតឡើងដោយសារតែសារពពួករា៉ឌីកាល់សេរី​(​Free Radical) ដែលកើតឡើងក្នុងអំឡុងពេលដំណើរការមេតាបូលីសជាប្រចាំ ដែលអាចប៉ះពាល់ដល់សរីរាង្គសំខាន់ៗនៃរាងកាយ រួមទាំងស្បែកផងដែរ។ ការធ្វើអុកស៊ីតកម្មលើស្បែកបណ្តាលឱ្យស្បែកចាស់មុនវ័យ។

ENAT មានផ្ទុកនូវវីតាមីន E ដែលដើរតួយ៉ាងសំខាន់ក្នុងការជួយពង្រឹងប្រព័ន្ធការពារខ្លួន។ វីតាមីននេះមានសមត្ថភាពពង្រឹងប្រព័ន្ធការពារខ្លួនឲ្យផលិតកោសិកា T-cells បន្ថែម (ប្រភេទកោសិកាឈាមស) ដែលចាំបាច់ដើម្បីប្រយុទ្ធប្រឆាំងនឹងការចម្លងរោគ។ ដូច្នេះ ENAT អាច​ជួយ​រាងកាយលោក​អ្នក​ប្រយុទ្ធ​ប្រឆាំង​នឹង​បាក់តេរី និង​មេរោគ​​គ្រោះថ្នាក់ និង​ពង្រឹងប្រព័ន្ធការពារខ្លួន​របស់លោក​អ្នក។

គេមិនណែនាំឲ្យប្រើ ENAT ជាមួយនឹងអាហារបំប៉នជាតិដែកទេ ព្រោះថា វីតាមីន E អាចធ្វើឲ្យសកម្មភាពរបស់អាហារបំប៉នជាតិដែកនៅក្នុងខ្លួនចុះខ្សោយ។ សូមពិគ្រោះជាមួយគ្រូពេទ្យរបស់លោកអ្នកសម្រាប់ព័ត៌មានបន្ថែម។

ENAT ជាធម្មតាមានភាពងាយស្រួលក្នុងការពិសា។ វីតាមីននេះ ​មិន​បណ្តាលឲ្យ​មាន​ផល​រំខាន​ណាមួយ​ឡើយ ប្រសិនបើលោកអ្នក​ប្រើ​តាម​កម្រិត​ និង​រយៈពេល​កំណត់។ សូមពិគ្រោះជាមួយគ្រូពេទ្យរបស់លោកអ្នកសម្រាប់ព័ត៌មានបន្ថែម។

គេមិនណែនាំឲ្យប្រើ ENAT ជាមួយនឹងឱសថធ្វើឲ្យ​ឈាមរាវ​ទេ ព្រោះវីតាមីន E មានឥទ្ធិពលប្រឆាំងនឹងការកកឈាម ដែលអាចបង្កើនលទ្ធភាពនៃការហូរឈាម។ សូមពិគ្រោះជាមួយគ្រូពេទ្យរបស់លោកអ្នកសម្រាប់ព័ត៌មានបន្ថែម។

លោកអ្នកអាចប្រើ ENAT មួយគ្រាប់ក្នុងមួយថ្ងៃ ឬតាមវេជ្ជបញ្ជាគ្រូពេទ្យ។

ការពិសាច្រើនហួសកម្រិតអាចបណ្តាលឲ្យរាក, ឈឺពោះ, មិនស្រួលពោះ, ឈឺក្បាល, ស្រវាំងភ្នែក, អស់កម្លាំងល្ហិតល្ហៃ, មានរោគសញ្ញាដូចជំងឺផ្តាសាយ។